មួយប៉ព្រិចភ្នែកភ្លើងឆេះអស់ផ្ទះបុគ្គលិករបស់អង្គការជប៉ុន២នាក់ប្តីប្រពន្ធ គ្មានសល់
01-May-2019 | ដោយ ពលមនសិការ
សៀមរាប៖ ផ្ទះបុគ្គលិករបស់អង្គការ ជប៉ុន ២នាក់ ប្តីប្រពន្ធ ត្រូវអគ្គិភ័យឆេះគ្មានសល់មួយប៉ព្រិចភ្នែកខណៈម្ចាស់កំពុងទៅការ ទុកឱ្យម្តាយធំនិងក្មួយនៅមើលផ្ទះប៉ុន្តែពុំមានអ្នករងរបួសក្នុងហេតុការណ៍គ្រោះអាក្រក់នេះកើតឡើងឡើយ។ គ្រោះអគ្គិភ័យនេះបង្កឱ្យមានការភ្ញាក់ផ្អើលឆោរឡោ ដល់ផ្ទះអ្នកជិតខាងព្រមទាំងបងប្អូន បង្កើត រស់នៅជាមួយគ្នា ក្នុងបរិវេនដីឡូតិ៍តែមួយនោះនាំគ្នាប្រមូល គ្រែ ទូ ខោ អាវ និង រថយន្តម៉ូតូចេញពីក្នុងកន្លែងកើតហេតុហើយមិនបានរាលដាលដល់ផ្ទះអ្នកជិតខាងទេ។
ហេតុការណ៍គ្រោះអគ្គិភ័យនេះបានកើតឡើងនៅវេលាម៉ោង៤និង៣០នាទីរសៀលថ្ងៃទី៣០ ខែមេសា ឆ្នាំ២០១៩ ស្ថិតនៅក្នុងក្រុមទី១០ ភូមិវាល សង្កាត់គោកចក ក្រុងសៀមរាប។
បើតាមសាក្សីពីបងប្អូនជីដូនមួយដែលរស់នៅក្នុងដីឡូតិ៍ជាមួយបានប្រាប់នៅកន្លែងកើតហេតុថា៖មុនពេលកើតហេតុពួកខ្ញុំកំពុងអង្គុយលេងជាមួយក្រុមគ្រួសារ នៅខាងមុខផ្ទះល្វែងពីមុខផ្លូវចូលផ្ទះឆេះរបស់ប្អូន។ ខណៈពេលនោះត្រូវបានម្តាយធំ និងក្មួយ ចុះរត់មកប្រាប់ថាឃើញភ្លើងឆេះចេញពីកន្លែងកុងម៉ាឱ្យពួកខ្ញុំជួយផង។
ប្រភពបានបន្តថាបន្ទាប់ពីម្តាយធំមកប្រាប់ភ្លាមពួកខ្ញុំក៏ទូរស័ព្ទទៅប្រាប់សមត្ថកិច្ចប៉ុស្តិ៍នគរបាលគោកចកដើម្បីឱ្យជួយហៅរថយន្តពន្លត់អគ្គិភ័យមកជួយផ្ទះប្អូនខ្ញុំផងព្រោះវាកំពុងតែឆេះមួយសន្ទុះក្រោយមកក៏ឃើញមានរថយន្តជាច្រើគ្រឿង មកជួយ ដូចចិត្តប្រាថ្នា ប៉ុន្តែ អកុសលត្រូវភ្លើងឆេះចង់អស់ទៅហើយព្រោះផ្លូវវាបត់បែនច្រើនពេក។
បើតាមប្រសាសន៍របស់លោកឧត្តមសេនីយ៍ត្រី ភឹង សម្បត្តិស្នងការរងទទួលផែនការិយាល័យបង្ការ ពន្លត់អគ្គិភ័យ និងសង្គ្រោះនៃស្នងការនគរបាលខេត្ត បានប្រាប់ថាករណីភ្លើងឆេះផ្ទះពលរដ្ឋនៅក្នុងសង្កាត់គោកចកនោះ មូលហេតុ ទុស្សេខ្សែភ្លើង។ ព្រោះម្ចាស់មិននៅទៅធ្វើការបាត់ចំណែកប្រពន្ធយកម្តាយនិងកូនទៅមើលជំងឺនៅឯប្រទេសថៃ ទុកឱ្យម្តាយធំ និងក្មួយជួយនៅមើលផ្ទះ។
លោកបានបញ្ជាក់ថា ម្ចាស់ផ្ទះ ឈ្មោះ ស ឈយ ភេទប្រុសអាយុ៣៥ឆ្នាំ មុខរបរ បុគ្គលិកអង្គការ ជប៉ុន ប្រពន្ធស៊ា ផល្លាអាយុ២៩ឆ្នាំ មុខរបរនៅផ្ទះមានកូន៣នាក់ ស្រី១ ប្រុស២ ។ ឆេះផ្ទះអស់ទាំងស្រុងក្នុងការខូចខាតមានផ្ទះ១ខ្នង ធ្វើអំពីថ្ម ក្រោម ឈើលើទំហំ១៤គុណ១៦ម៉ែត្រ។
លោកបានបញ្ជាក់ទៀតថា ក្នុងការជួយអន្តរាគមន៍ ករណីភ្លើងឆេះផ្ទះនោះមានរថយន្ត ចំនួន៥គ្រឿង ក្នុងនោះមាន៖រថយន្តពន្លត់អគ្គិភ័យរបស់ស្នងការនគរបាលខេត្តចំនួន២គ្រឿង ប្រើទឹកអស់ទាំង២ឡាន, រថយន្ត ពន្លត់អគ្គិភ័យរបស់អាជ្ញាធរជាតិអប្សរាចំនួន២គ្រឿងប្រើទឹកអស់ទាំង២ឡាននិងរថយន្តពន្លត់អគ្គិភ័យរបស់នគរបាលការពារបេតិកភ័ណ្ឌចំនួន១គ្រឿងប្រើទឹកអស់១ឡាន។ ចំណែកការខូចខាតទ្រព្យសម្បត្តិនិងទឹកប្រាក់ប្រមាណជាង៥០០០០ដុល្លារផងដែរនេះបើតាម សម្តីរបស់លោក ស ឈយ ដែលជាម្ចាស់ផ្ទះប្រាប់សមត្ថកិច្ចយើងនៅកន្លែងកើតហេតុ ៕
ចំនួនអ្នកទស្សនា
- ថ្ងៃនេះ4731
- ម្សិលមិញ6261
- សប្តាហ៍នេះ23111
- ខែនេះ138261
- ឆ្នាំនេះ138261
- សរុប20580717